Psalms 60

Kuomba Kuokolewa

(Kwa Mwimbishaji: Mtindo Wa Shushani Eduthi. Utenzi Wa Daudi. Wa Kufundisha. Wakati Alipopigana Na Waaramu Kutoka Aramu-Naharaimu Na Aramu-Soba, Yoabu Aliporudi Nyuma Na Kuwaua Waedomu 12,000 Katika Bonde La Chumvi)

1 ^aEe Mungu, umetukataa na kutokea ghafula juu yetu,
umekasirika: sasa turejeshe upya!

2 Umetetemesha nchi na kuipasua;
uiponye mavunjiko yake, kwa maana inatetemeka.

3 ^bUmewaonyesha watu wako nyakati za kukata tamaa;
umetunywesha mvinyo unaotuyumbisha.

4 ^cKwa wale wanaokucha wewe,
umewainulia bendera,
ili iweze kutwekwa dhidi ya upinde.

5 ^dTuokoe na utusaidie kwa mkono wako wa kuume,
ili wale uwapendao wapate kuokolewa.

6 ^eMungu amenena kutoka patakatifu pake:
“Nitaigawa Shekemu kwa ushindi
na kulipima Bonde la Sukothi.

7 ^fGileadi ni yangu na Manase ni yangu;
Efraimu ni kofia yangu ya chuma,
nayo Yuda ni fimbo yangu ya utawala.

8 ^gMoabu ni sinia langu la kunawia,
juu ya Edomu natupa kiatu changu;
nashangilia kwa kushindwa kwa Ufilisti.”

9 Ni nani atakayenipeleka hadi mji wenye ngome?
Ni nani atakayeniongoza hadi nifike Edomu?

10 ^hEe Mungu, si ni wewe uliyetukataa sisi,
na hutoki tena na majeshi yetu?

11 ⁱTuletee msaada dhidi ya adui,
kwa maana msaada wa mwanadamu haufai kitu.

12 ^jKwa msaada wa Mungu tutapata ushindi,
naye atawaponda adui zetu.